सरकारेक फ्री राशन बट्टी ,
पहाड़ों मी खेती कू बजर पड़ गौ।
हाथ -हाथ मी मोबाइल ,
काम धंध मी बजर पड़ गौ।
साग पात ,फल फूल उजड़ गयी ,
बानर हेगी बेहिसाब , बजर पड़ गौ।
द्वी मिनट मी मैग्गी बण जाने ,
लेसु रवाटो मी बजर पड़ गौ।
सब जाण फैगी पहाड़ छोड़ बेर ,
गौ -गौनो मी बजर पड़ गौ।
असोज सिमरु ऐ जा ब्वारी ,
कहाणेक है रै चुटाचुट,
धानक थुपड़ भिझ जानिइये ,
घा काटी बेर खितेड छीन लुट।
नान्तिनो कू चाडों टेम नेहे ,
खाण पीणो काकू ध्यान है रौ ,
हौ -भान कारण छीन ,
खौह मी है रै दै।
काव लाग रौ यौ असोज कू ,
सिमरेन सिमरने आफत ऐ रै ,
झन कै ब्वारी -भट भेज दियो ,
भटाल म्येरि कमर तोड़ रै।
मडु टीपेन -टीपने हाथ पटे गी ,
अखोड़ बौठम बट्टी बानर हीलेगी ,
बजर पड़ जो यौ असोजक मेहण कू ,
काम ज्यादेक , भकार खाली रुण।
भौते मुश्किल हू पधान चुनेण मी ,
नानू -नान गौव म्हे ठाण है जानि पाँच ,
क्वे बिरादर , क्वे रिश्तेदार ,
क्वे ठुल , क्वे कका , क्वे नान ,
वोट काकू दू , खौर परेशान।
बड़ मुश्किल छू हो दाज्यू ,
काकू वोट दीढ़ छू ,
मुनापीढ़ छू रोज़ ,
लोकसभा , विधानसभा हबे ,
मुश्किल छू चुनण गौव पधान।
केके चिन्ह अन्नानास ,
केके उगता सूरज ,
केकू मिल जा अनाज की बाली ,
केकु मोराक फाँख,
गजबजी जा हाथ , खौर परेशान।
ऊ कू मी यौ करन ,
दुहोर कू मी करन विकास ,
चुनाव जीत बेर ,
लाट साहब बण जानी ,
हर गौव ग्राम पधान।
सरासर सिमरनि पधान ज्यू ,
लैंटर वाल घर बढ़े लीन्ही ,
पुराण बिछाई खडंच मी ,
नई डुंग बिछे दीनी,
कामे बखत मी ,
पधान पत न का लुक जानी।
